RAMA D: RnB NDANI YA KISINGELI, AFUNGUKA HAYA..

Nguli wa muziki wa rnb nchini Tanzania kutoka jijini Arusha na hit maker wa vibao vizuri kama vile kikao cha familia, sara, kipenda roho na nyingine nyingi, RAMA D, amezunguzia wimbo mpya wa mtindo wa kisingeli unaokwenda kwa jina la MAZOEA alioshirikiana na mwanadada YOUNG YUDA anayefanya vizuri katika aina hiyo ya muziki ambapo RAMA D ameweza kuchanganya mtindo wake wa rnb katika nyimbo hiyo nzuri yenye mahadhi ya Kisingeli.
Akiongea katika mahojiano na kipindi cha Ladha 3600 cha Efm, RAMA amesema kuwa ameamua kufanya chemistry hiyo ili kutengeneza ladha ya muziki wenye mahadhi ya kitanzania utakaoweza kufanya vizuri na kuitambulisha Tanzania kote duniani ikizingatiwa kuwa aina hiyo ya muzinki ndiyo aina pekee inayoonekana kuwa na asili ya kitanzania ikilinganishwa na aina zingine za muziki wa kizazi kipya zinazofanywa na wasanii wengi nchini.
Amesema hata katika nchi nyingine zenye aina ya muziki wenye ladha za pekee mahususi kuzitambulisha identity zao kama vile Nigeria walianza kwakuchanganya mitindo mbalimbali ya muziki wanaofanya na ladha za muziki wao wa asili hatimaye kutengeneza aina ya muziki wa pekee na unaopendwa kote duniani.
Aidha RAMA ameongeza kuwa kibao hicho kwa namna nyingine kitasaidia kuutambulisha vyema muziki wa kisingeli kama aina ya muziki unayotoa fursa ya ajira kwa vijana na sio muziki wa kihuni kama unavyochukuliwa na baadhi ya watu.
RAMA D ni miongoni mwa wasanii wazuri wa muziki wa rnb kutoka Tanzania.